KIKWETE ASEMA HALI YA KISIASA ZANZIBAR INAHITAJI MJADALA WA KITAIFA

Rais mteule wa jamhuri ya muungano wa Tanzania bwana Jakaya kikwete jana kwa mara ya kwanza alilihutubia bunge,ikiwa ni siku mbili baada ya kupatikana kwa spika wa bunge hilo na siku moja baada ya uteuzi alioufanya wa ndugu Edward Ngoyai Lowassa kuthibitishwa na bunge kua waziri mkuu wa tisa wa jamuhuri hii ya Tanzania.

Ikiwa kama ni hotuba ya kutoa dira ya serikali yake ya awamu ya nne,mambo mengi aliyazungumzia kwa kina kwa takribani masaa mawili lakini mpasuko wa kisiasa uliopo Zanzibar umeonekana kuchukua uzito mkubwa na kua gumzo katika mitaa mbalimbali ya visiwa hivi ambavyo mchakato wa kisiasa umekua na matatizo makubwa bila kupewa uzito unaostahili.

Kumbukumbu zangu zinanisukuma kusema kua ukiacha mwalimu Nyerere,Jakaya kikwete anakua kiongozi wa kwanza wa ngazi za juu kuzungumzia suala hilo hadharani ambalo linaonyesha kumkera kama si kumkatisha tamaa kwani halitoi muelekeo mwema kwani hali ya chuki inayoendelea kujengeka katika misingi ya Upemba na Uunguja inazidi kuota mizizi kama si kushamiri.

Inawezekana Kikwete amehamasika kupasua jipu hili kufuatia muendelezo wa matokeo ya uchaguzi yanayoendelea kugawa visiwa hivi katikati.Chama tawala(CCM) hakikuambulia hata kiti kimoja katika kisiwa cha pemba ambacho kinaaminika kua ni ngome kuu ya chama cha CUF,huku CCM ikijizolea viti vyote vya Unguja isipokua katika jimbo la mji mkongwe ambalo wapinzani wanaonekan kujizatiti.Nikiwa katika mizunguko yangu ya kawaida katika mitaa ya mji huo mkongwe leo nimeshuhuda makundi mbalimbali ya watu wakijadili hotuba hiyo huku wengi wakijiuliza ikiwa mfupo uliomshinda Mwinyi na Mkapa yeye(kikwete)atauweza???

Naamini kabisa kua haiitaji viongozi wetu kua na shahada za chuo kikuu ili kubaini uzito wa tatizo lililopo visiwani hapa isipokua ushabiki wa kisiasa ndio unawaponza kuchukua hatua za haraka kutafuta ufumbuzi wa tatizo hili ambalo ni kama bomu linalosubiri mda kulipuka.Cha ajabu ni viongozi hawa kuchukulia mpasuko huo kama silaha ya wao kujijengea umaarufu wa kisiasa na hata kuendelea kuungwa mkono na wanachama wao.

Nimekua nikijiuliza maswali mengi bila ya kupata majibu sawia,Kwanini watu wafike mahali hadi kushindwa kumpangisha mtu nyumba ya kulala kutokana na chuki zilizojengeka katika hali ya upemba na uunguja?Kwanini watu wasusiane maiti kutokana utofauti wa asili zao?Kwanini watu waendelee kupiga kura za chuki bila kuzingatia uwezo wa wagombea wanaowapigia?Kwanini watu waendelee kutofautishana kwa sura na kunyoosheana vidole vya uunguja na upemba?

Fursa aliyoahidi kuitoa Kikwete kujadili mustakabli wa kisiasa katika visiwa hivi, naichukulia kama tunu ya wanablog kuanza kuelekeza fikra zao katika kutoa nafasi ya TAFAKURI makini zinazozingatia suluhisho zaidi ya kuendelea kuhoji matatizo yaliyopo.Nataka tuichukulie nafasi hii kulifanyia jambo taifa letu jambo la neema na matumaini kwa vizazi vijavyo.